Vaðmál einkennist af skálínum í voðinni sem verða til við það að bindingin færist til um einn þráð við hvert fyrirdrag. Skálínan liggur ýmist frá vinstri til hægri eða öfugt en venja er að telja þá hlið efnisins rétthverfa þar sem skálínur liggja frá vinstri og upp til hægri. Vaðmálsvefnaður var algengur hér á landi og vaðmál var ein aðalútflutningsvara okkar fyrr á öldum. Mikið af fataefnum fyrr og nú er ofið í vaðmálsbindingar og telja má öruggt að það sé algengasta tegund af vefnaði í heiminum, enda til óteljandi afbrigði af bindingunni. Vaðmál með beinum inndrætti og/eða stigi og oddavaðmál.

Í hringavaðmáli mynda skálínurnar tígla eða hringi. Það gerist með því að bæði er dregið inn í odda í höföld og stigið í odda. Hægt er að gera mjög fjölbreytt og skemmtileg munstur í hringavaðmáli og aukast möguleikarnir með auknum fjölda skafta og skammela.

Víxlað vaðmál verður til á þann hátt að niðurröðun uppistöðuþráða eða fyrirdraga er breytt í einhverri ákveðinni frumbindingu en við það hverfur skálínuáferðin. Víxlað vaðmál minnir á og er gjarnan ruglað saman við ormeldúk vegna þess að þræðirnir víxlast og einnig er hægt að nota það í kafla skiptri vaðmálsbindingu.

Það kallast fléttað vaðmál þegar skálínur í vaðmáli koma hornrétt hver á aðra og virðast fléttast saman. Fléttað vaðmál er jafnan leitt af vaðmáli með jafna band- og þráðaráferð og þráðafjöldi eins munsturs verður að ganga upp þegar deilt er með skaftafjölda frumbindingarinnar. Þegar skálínur í vaðmáli eru ekki lengur beinar heldur bogadregnar kallast vendin bylgjað vaðmál. Bindimunstrið má teikna með því að þræða einn, tvo eða fleiri þræði í höföld á sama hafaldaskafti. Uppbindingin er ýmist á fjögur, sex, átta eða fleiri sköft og stigið beint, í odda eða eins og hugmyndaflugið leyfir.

Þegar bindimunstur eru teiknuð þarf stundum að gera vinnuteikningu í köflum, tveimur, þremur eða fleirum, og síðan vinna inndráttarmunstur eftir kaflamunstrinu. Í byrjun er ákveðið hve margir þræðir eru í einni rúðu í kaflamunstrinu og unnið samkvæmt því. Í hverjum kafla er bindimunstur þeirrar frumbindingar sem verið er að vinna eftir endurtekið eins oft og þörf er á, eða þar til kaflinn hefur fengið sína stærð samkvæmt kaflamunstrinu. Í raun er verið að stækka munstrið sem ofið er eftir. Það má vefa kaflaskipt vaðmál eftir öllum tvíkaflamunstrum og ýmist eru notuð þrjú eða fjögur hafaldasköft fyrir hvern kafla. Kaflaskipt vaðmálsbinding getur hentað vel í borðdúka, púðaborð, áklæði eða fataefni svo eitthvað sé nefnt.